පසුගිය දශක එකහමාරක කාලය තුළ ශ්රී ලාංකිකයන්ගේ ආයු කාලය මීට පෙර කිසිදා නොවූ අයුරින් ඉහළ ගොස් ඇති බවත්, ඒ පිටුපස ඇති සැබෑ රහස මෙරට ක්රියාත්මක වන “ජාතික ප්රතිශක්තිකරණ වැඩසටහන” බවත් සෞඛ්ය අමාත්යාංශය අනාවරණය කරනවා.
හෙටින් (24) ඇරඹෙන ලෝක ප්රතිශක්තිකරණ සතිය නිමිත්තෙන් සෞඛ්ය ප්රවර්ධන කාර්යාංශයේ පැවති මාධ්ය හමුවකට එක්වෙමින්, වසංගත රෝග විද්යා අංශයේ ප්රධාන වසංගත රෝග විශේෂඥ වෛද්ය පාලිත කරුණාපේම මහතා මෙම සුවිශේෂී තොරතුරු අනාවරණය කළේය.
වෛද්යවරයා පෙන්වා දෙන්නේ 1978 වසරේ සිට මෙරට ක්රියාත්මක වන විධිමත් ප්රතිශක්තිකරණ වැඩසටහන හේතුවෙන් ලාංකේය දරුවන් වටා ශක්තිමත් ආරක්ෂක පවුරක් ගොඩනැගී ඇති බවයි.
එහි ප්රතිඵලයක් ලෙස:
ලෝකයේ දියුණු රටවල් පවා තවමත් බිය වන පෝලියෝ රෝගය මෙරටින් සහමුලින්ම අතුගා දමා ඇත.
රුබෙල්ලා සහ නවජ ටෙටනස් (Neonatal tetanus) රෝග ද ලංකාවෙන් තුරන් කිරීමට සෞඛ්ය අංශ සමත් වී තිබේ.
දරුවන්ගේ මරණ අනුපාතය අවම වීම
”අපේ රට ප්රතිශක්තිකරණය අතින් ලෝකයේම ඉතා ඉහළ තලයක තියෙන්නේ. එන්නත් මඟින් වළක්වා ගත හැකි රෝග පාලනය කිරීම නිසා පසුගිය වසර 15 තුළ මෙරට දරුවන්ගේ මරණ අනුපාතය විශාල ලෙස පහත වැටුණා. ඒ වගේම ජනතාවගේ සාමාන්ය ආයු කාලය ඉහළ යාමටත් මෙය සෘජුවම බලපා තිබෙනවා,” යැයි වෛද්ය කරුණාපේම මහතා වැඩිදුරටත් සඳහන් කළේය.
අපේ රටේ සෞඛ්ය ක්ෂේත්රය ලැබූ මෙම අතිවිශාල ජයග්රහණය සැමරීම සඳහා අප්රේල් 24 සිට 30 දක්වා ලෝක ප්රතිශක්තිකරණ සතිය ක්රියාත්මක වේ.
එන්නත්කරණය යනු හුදෙක් රෝගයකින් ආරක්ෂා වීමක් පමණක් නොව, එය ජාතියක ජීව කාලය තීරණය කරන තීරණාත්මක සාධකය බව මෙම නවතම දත්ත මඟින් යළිත් තහවුරු වී ඇත.
