ගාල්ල, තෙලිකඩ පොලිස් වසමට අයත් මාවඩවිල අක්කර 13 ප්රදේශයෙන් අද (03) අලුයම වාර්තා වූයේ මුළු ප්රදේශයම කම්පා කළ අතිශය අවාසනාවන්ත පුවතකි.
පවුල් ආරවුලක් මුල් කරගනිමින් පුද්ගලයෙකු විසින් සිදුකළ තියුණු ආයුධ ප්රහාරයකින් එකම පවුලේ දෙදෙනෙකු ජීවිතක්ෂයට පත්වී තවත් අයෙකු බරපතල තුවාල ලබා තිබේ.
අද උදෑසන 6.00 ට පමණ මෙම බිහිසුණු ප්රහාරය එල්ල වී ඇත්තේ මාවඩවිල ප්රදේශයේ පිහිටි නිවසකදීය.
සැකකරු විසින් නිවසේ සිටි පිරිසට තියුණු ආයුධයකින් (කඩුවකින්) අනුකම්පා විරහිතව පහර දී ඇත.
ප්රහාරයෙන් බරපතල තුවාල ලැබූ තිදෙනෙකු වහාම රෝහල් ගත කිරීමට පියවර ගත්තද, රෝහලට ඇතුළත් කරන විටත් දෙදෙනෙකු මියගොස් සිටි බව පොලීසිය සඳහන් කරයි.
ප්රහාරයට ලක්වූ අනෙක් කාන්තාව මියගිය මිත්තණියගේ දියණිය වන අතර, ඇයගේ එක් අතක් ශරීරයෙන් වෙන් වන ලෙස ප්රහාරය එල්ල වී තිබේ.
ඇය මේ වන විට කරාපිටිය ශික්ෂණ රෝහලේ දැඩි සත්කාර ඒකකයේ (ICU) මරණය සමඟ සටන් කරමින් ප්රතිකාර ලබයි.
ඝාතනයට සම්බන්ධ සැකකරු 35 හැවිරිදි වියේ පසුවන උණවටුන දලවැල්ල ප්රදේශයේ පදිංචිකරුවෙකි.
ඔහු හිටපු හමුදා සෙබළෙකු බව පොලීසිය අනාවරණය කරගෙන ඇත.
ඔහු මියගිය මිත්තණියගේ අනෙක් දියණියගේ ස්වාමිපුරුෂයා (බෑනා) වන අතර, ඔහුගේ බිරිඳ මේ වන විට ඉතාලියේ රැකියාවක නිරතව සිටියි.
මෙම ඝාතනයට හේතු වී ඇත්තේ පවුල් ආරවුලක් බව මූලික පරීක්ෂණවලදී හෙළි වී තිබේ.
සැකකරු මේ වන විට තෙලිකඩ පොලීසිය විසින් අත්අඩංගුවට ගනු ලැබ ඇත.
