පාතාලයේ අභිරහස් ඝාතනයක් පිළිබඳ ඇසින් දුටු ප්රධාන සාක්ෂිකරු වූ සඳුන් උදාර අල්විස් හෙවත් ‘හාවා’ නමැත්තාගේ සිරුර අද (06) පෙරවරුවේ හොරණ, තිබ්බොටුගොඩ සුසාන භූමියෙන් ගොඩගනු ලැබීය.
ඒ, හොරණ ප්රධාන මහෙස්ත්රාත් ලක්මිණි විදානගම මහත්මිය ඉදිරියේදීය.
2021 වසරේදී පානදුර පිංවල සුසාන භූමියේදී පුද්ගලයෙකු ඝාතනය කිරීමේ සිදුවීමක් සම්බන්ධයෙන් සංවිධානාත්මක අපරාධ කල්ලි නායක ”කුඩු සළිඳු” සහ ඔහුගේ සමීපතම ගෝලයෙකු වූ ”කුඩු නිලංග” ඇතුළු පිරිසකට එරෙහිව නඩුවක් විභාග වෙමින් පවතී.
මෙම අපරාධය සියැසින් දුටු ප්රධානතම සාක්ෂිකරු වූයේ ත්රිරෝද රථ රියදුරෙකු වූ ‘හාවා’ ය.
ඔහු අධිකරණය හමුවේ සාක්ෂි ලබාදෙමින් පාතාලයට එරෙහිව දැඩිව පෙනී සිටියේය.
2024 අගෝස්තු 3 වැනිදා, සාමාන්ය පරිදි සිය වෘත්තියේ යෙදී සිටි ඔහු, ගැබිනි කාන්තාවක සමඟ කුලී ගමනක් යන බව පවසා නිවසින් පිටත්ව ගොස් තිබුණි.
එහෙත් ඔහු යළි නිවසට නොපැමිණි අතර, ඒ පිළිබඳව ඔහුගේ බිරිඳ වූ චතුරි ලක්ෂානී විසින් හිරණ පොලිසියට පැමිණිල්ලක් ඉදිරිපත් කළාය.
වලාන මධ්යම දූෂණ මර්දන ඒකකය මගින් සිදුකළ දීර්ඝ විමර්ශනයකදී අනාවරණය වූයේ, ‘හාවා’ ව සූක්ෂ්ම ලෙස පැහැරගෙන ගොස් ඝාතනය කර ඇති බවයි.
පිංවල නඩුවේ සාක්ෂි විනාශ කිරීම සඳහා ”කුඩු නිලංග” ඇතුළු පිරිස මෙම ඝාතනය සැලසුම් කර ඇති බව හෙළි විය.
“ඝාතනය සිදුකළ පිරිස ‘හාවා’ ගේ සිරුර හොරණ තිබ්බොටුගොඩ සුසාන භූමියේ රහසින් මිහිදන් කර තිබූ බව විමර්ශන නිලධාරීන් සොයාගෙන තිබේ.
මෙම සාහසික ඝාතනයට සෘජුවම සම්බන්ධ වූ බවට සැකකෙරෙන පුද්ගලයා සහ ඔහුට සහාය දුන් තවත් දෙදෙනෙකු දැනටමත් අත්අඩංගුවට ගෙන රැඳවුම් නියෝග මත රඳවාගෙන ප්රශ්න කරනු ලබයි.
අද පෙරවරුවේ මිල්ලනිය ප්රාදේශීය සභාවේ සේවකයන්ගේ සහාය ඇතිව සිරුර ගොඩගත් අතර, අධිකරණ වෛද්ය පරීක්ෂණ මගින් ඉදිරි විමර්ශන සිදු කිරීමට නියමිතය.
පාතාල සාක්ෂිකරුවන්ට එල්ල වන මෙම මාරාන්තික තර්ජනය රට තුළ දැඩි කතාබහක් නිර්මාණය කර ඇත.
