“අපට ඔබේ ප්රශංසාව පමණක් සෑහේ” – ස්විස් ජාතිකයා පුදුම කළ පොලිස් පරීක්ෂකවරයාගේ අභිමානවත් පිළිතුර – දඹුල්ල පොලිසියේ දක්ෂතාවයට ජාත්යන්තරයේ ප්රශංසා
ශ්රී ලංකා පොලිසියේ ගෞරවය ජාත්යන්තරය හමුවේ ඔසවා තබමින්, අස්ථානගත වූ ස්විස් ජාතික ගුරුවරයෙකුගේ වටිනා ජංගම දුරකථනය පැය කිහිපයක් ඇතුළත සොයා දීමට දඹුල්ල මූලස්ථාන පොලිසියේ රථවාහන අංශයේ නිලධාරීන් සමත්ව තිබෙනවා.
“මගේ ජීවිතය නැවත ලැබුණා හා සමානයි” පවසමින් හැඟීම්බර වූ විදේශිකයාට පොලිසිය දුන් පිළිතුර මේ වන විට මුළු රටේම අවධානය දිනා ගැනීමට සමත් වී තිබේ.
ශ්රී ලංකාවේ සංචාරයක නිරතව සිටින 28 හැවිරිදි ස්විස්ටර්ලන්ත ජාතික ගුරුවරයෙකු වන ජියෑන් මුලර් (Gian Muller), මහනුවර සිට පැමිණි බස් රථයකදී තම වටිනා ඇපල් (Apple) වර්ගයේ දුරකථනය අතපසුවීමකින් අතහැර ගොස් තිබුණි.
දඹුල්ල නගරයේදී තමන් අසරණ වී ඇති බව දැනගත් වහාම ඔහු ඒ අසල රාජකාරියේ නිරතව සිටි පොලිස් සැරයන් (46389) යූ. කේ. නිහාල් මහතාට ඒ බව දැනුම් දී ඇත.
වහා ක්රියාත්මක වූ සැරයන්වරයා, බස් රථයේ CCTV පද්ධතිය පරීක්ෂා කරන බවට කළ තීරණාත්මක දැනුම් දීමත් සමඟ, මුලින් දුරකථනයක් හමු නොවූ බව පැවසූ බස් සේවකයින් විනාඩි දහයක් ඇතුළත එය පොලිසියට ගෙනැවිත් භාර දීමට කටයුතු කර තිබේ.
තම අධ්යාපන කටයුතුවලට අදාළ අතිශය වටිනා දත්ත රැසක් සහිත දුරකථනය නැවත ලැබීමෙන් අමන්දානන්දයට පත් ජියෑන් මුලර්, පොලිසියට ස්තුතිය පළ කරමින් විමසා සිටියේ “මම මේ වෙනුවෙන් පොලිසියට කළ යුත්තේ කුමක්ද?” යන්නයි.
ඔහු එහිදී කිසියම් මුදල්මය තෑග්ගක් හෝ උපකාරයක් කිරීමට සූදානම්ව සිටි බව පෙනෙන්නට තිබුණි.
එහිදී දඹුල්ල මූලස්ථාන පොලිස් පරීක්ෂක සුගත් බණ්ඩාර විජේසුන්දර මහතා ලබාදුන් පිළිතුර අතිශය ආදර්ශමත් විය. “මෙරට වැසියන්ට වගේම විදේශිකයන්ටත් සේවය කරන්න අපි බැඳී ඉන්නවා. ඔබ කරන ඔය ප්රශංසාව විතරක්ම අපේ සේවයට සෑහෙනවා,” යනුවෙන් ඔහු පැවසීය.
ශ්රී ලංකා පොලිසියේ මෙම සුවිශේෂී සහ දක්ෂ සේවාව පිළිබඳව ජාත්යන්තර සංචාරක වෙබ් අඩවි හරහා ලෝකයටම දැනුම් දෙන බව පවසමින් ස්විස් ජාතිකයා ඉමහත් සතුටින් පිටව ගොස් තිබේ.
“අවංක රාජකාරිය යනු මිල කළ නොහැකි සේවයකි. එක් නිලධාරියෙකුගේ අවංකභාවය රටක සමස්ත ප්රතිරූපයම වෙනස් කිරීමට සමත් වේ.”
මෙම පුවත අපට කියා දෙන්නේ ලෝකය ඉදිරියේ අපේ රටේ ගෞරවය රැඳී ඇත්තේ අප ඉටු කරන වගකීම් සහගත සහ මානුෂීය සේවය මත බවයි.
