ට්‍රම්ප්ගේ ප්‍රකාශයෙන් ලෝක තෙල් වෙළෙඳපොළ කැළඹෙයි – බොරතෙල් මිල ශීඝ්‍රයෙන් ඉහළට!

අමෙරිකානු ජනාධිපති ඩොනල්ඩ් ට්‍රම්ප් විසින් ඉරානය සම්බන්ධයෙන් සිදුකළ දැඩි ප්‍රකාශයත් සමඟ ලෝක වෙළෙඳපොළේ බොරතෙල් මිල යළිත් වරක් ඉහළ ගොස් තිබේ.

මෙම තත්ත්වය ගෝලීය ආර්ථිකයට ප්‍රබල බලපෑමක් එල්ල කරනු ඇතැයි ආර්ථික විශ්ලේෂකයෝ අනතුරු අඟවති.

ලෝකයේ සමස්ත බලශක්ති අවශ්‍යතාවයෙන් 20%ක් ප්‍රවාහනය කරන ප්‍රධාන නාවික මාර්ගය වන හෝර්මුස් සමුද්‍ර සන්ධියේ පවතින බාධාකාරී තත්ත්වය නුදුරේදීම සමනය වනු ඇතැයි පැවති බලාපොරොත්තුව, ට්‍රම්ප්ගේ මෙම කතාවත් සමඟ ගිලිහී ගොස් ඇත.

ඉරානයේ පාලන තන්ත්‍රය වෙනස් කිරීම හෝ එරට යටිතල පහසුකම් විනාශ කිරීම පිළිබඳව ජනාධිපතිවරයා සිදුකළ ප්‍රකාශය හමුවේ සැපයුම් දාමයට තවදුරටත් තර්ජන එල්ල වනු ඇතැයි ආයෝජකයින් බිය වීම මිල ඉහළ යාමට ප්‍රධාන හේතුව වී තිබේ.

ජනාධිපතිවරයාගේ කතාව ආරම්භ වීමට පෙර බ්‍රෙන්ට් බොරතෙල් බැරලයක මිල අමෙරිකානු ඩොලර් 100 මට්ටමේ පැවතුණි.

කතාව අවසාන වන විට මිල 4% කින් පමණ ඉහළ ගොස් ඇත.

මේ වන විට බැරලයක මිල ඩොලර් 105.38ක් දක්වා ඉහළ ගොස් ඇති බව වාර්තා වේ.

පසුගිය පෙබරවාරි 28 වනදා අමෙරිකානු සහ ඊශ්‍රායල ප්‍රහාරවලට ප්‍රතිචාර වශයෙන් ඉරානය මෙම නාවික මාර්ගය භාවිතා කරන නැව්වලට ප්‍රහාර එල්ල කරන බවට තර්ජනය කළේය.

එතැන් සිට මෙම කලාපයේ නාවික කටයුතු තවමත් සම්පූර්ණයෙන් යථා තත්ත්වයට පත්ව නොමැති අතර, නවතම දේශපාලන උණුසුම හමුවේ බලශක්ති අර්බුදයක් පිළිබඳ බිය ලොව පුරා යළිත් මතු වී තිබේ.