කුකුළු මස් ව්යාපාරිකයකුගෙන් රුපියල් 10,000ක අල්ලස් මුදලක් ලබා ගනිද්දීම රාගම පොලීසියේ රථ වාහන අංශයේ ස්ථානාධිපතිවරයා (උප පොලිස් පරීක්ෂක) අත්අඩංගුවට ගත් බව අල්ලස් හෝ දූෂණ චෝදනා විමර්ශන කොමිෂන් සභාව පවසනවා.
රාගම, රාම්පිටිය ප්රදේශයේ පදිංචි ව්යාපාරිකයෙකු සතිපොළ මධ්යයේ පවත්වාගෙන යන කුකුළු මස් අලෙවිසැලෙන්, සතියකට රුපියල් 5,000 බැගින් ‘පංගුවක්’ ලබාදෙන ලෙස මෙම නිලධාරියා බලපෑම් කර තිබේ.
ඒ අනුව සති දෙකක හිඟ මුදල ලෙස රුපියල් 10,000ක මුදලක් ලබා ගැනීමට සැකකාර නිලධාරියා සතිපොළ වෙත පැමිණ ඇත.
විමර්ශනවලදී අනාවරණය වී ඇත්තේ මෙම උප පොලිස් පරීක්ෂකවරයා අල්ලස් මුදල ලබා ගැනීමට පැමිණ ඇත්තේ තවත් පොලිස් සැරයන්වරයෙකු සමඟ බවයි.
පොලිස් පොතේ ‘නගරයේ රථ වාහන රාජකාරි සඳහා පිටත්ව යනවා’ යැයි සටහන් යොදා, රජයේ නිල යතුරුපැදියෙන්ම මොවුන් අල්ලස් ලබා ගැනීමට පැමිණ ඇති බව පොලිස් ආරංචි මාර්ග සඳහන් කරයි.
මුදල ලබා ගන්නා අවස්ථාවේදීම අල්ලස් කොමිසමේ නිලධාරීන් කණ්ඩායමක් විසින් 58 හැවිරිදි මෙම නිලධාරියාව අත්අඩංගුවට ගෙන ඇත.
මොහු මීට මාස දෙකකට පෙර බියගම පොලීසියේ සිට රාගම පොලීසියට මාරු වී ආ අයෙකි.
සැකකරු අධිකරණය වෙත ඉදිරිපත් කිරීමට නියමිතව තිබුණි.
