ලංකාවට ආපු විනය ඉන්දියාවටත් යයි – ලංකාවේ ගෑස් පෝලිම් දැන් ඉන්දියාවටත්?

ලංකාවට ආපු විනය ඉන්දියාවටත් යයි – ලංකාවේ ගෑස් පෝලිම් දැන් ඉන්දියාවටත්?

බටහිර ආසියාවේ (මැදපෙරදිග) පවතින යුදමය වාතාවරණය හේතුවෙන් අසල්වැසි ඉන්දියාව දරුණු ඉන්ධන සහ ගෑස් හිඟයකට මුහුණ දී සිටින බව වාර්තා වෙනවා.

මේ හේතුවෙන් එරට ප්‍රධාන නගර රැසක හෝටල්, අවන්හල් සහ නේවාසිකාගාර පවත්වාගෙන යාමට නොහැකි තත්ත්වයක් උදාවී ඇති බව ඉන්දීය මාධ්‍ය වාර්තා කරනවා.

ඉන්දියාවේ ජාතික අවන්හල් සංගමය (NRAI) සහ ඉන්දියානු හෝටල් සහ අවන්හල් සංගමය (AHAR) ඇතුළු සංවිධාන රැසක් අනතුරු අඟවන්නේ, වාණිජමය ගෑස් සිලින්ඩර සැපයුම 75% කින් පමණ පහත වැටී ඇති බවයි.

දැනටමත් මුම්බායි නගරයේ හෝටල් සහ අවන්හල්වලින් 20% ක් පමණ තාවකාලිකව වසා දමා ඇති අතර ඉදිරි දින දෙක ඇතුළත තත්ත්වය සමනය නොවුණහොත් 50% ක් පමණ වසා දැමීමට සිදුවනු ඇතැයි ගණන් බලා තිබේ.

මෙම නගරවල ද ගෑස් හිඟය නිසා හෝටල් හිමියන් දැඩි අර්බුදයකට පත්ව සිටින අතර, බොහෝ ස්ථානවල මෙනු පත් (Menu) සීමා කිරීමට පියවර ගෙන ඇත.

චන්දිගාර් සහ භෝපාල් වැනි නගරවල ගෑස් ලබා ගැනීම සඳහා ජනතාව දිගු පෝලිම්වල රැඳී සිටින බව වාර්තා වේ.

මෙම අර්බුදය දිගින් දිගටම පැවතුණහොත් එය ඉන්දීය සංචාරක කර්මාන්තයට සෘජුවම බලපානු ඇත.

හිමාචල් ප්‍රදේශ්, ගෝව සහ උත්තරාකන්ඩ් වැනි සංචාරක ආකර්ෂණය දිනාගත් ප්‍රාන්තවල හෝටල් හිමියන් පවසන්නේ තමන් සතු ගෑස් තොග දින එකකට හෝ දෙකකට පමණක් සෑහෙන බවයි.

මීට වසර කිහිපයකට පෙර ශ්‍රී ලංකාව මුහුණ දුන් අමිහිරි ගෑස් හිඟය පිළිබඳ මතකය මෙම පුවතත් සමඟ යළිත් කරළියට පැමිණ තිබේ.

කෙසේ වෙතත්, ඉන්දියාවේ මෙම අස්ථාවර භාවය ලංකාවේ සංචාරක ව්‍යාපාරයට යම් වාසියක් ගෙන දිය හැකි බව ආර්ථික විශ්ලේෂකයින් පෙන්වා දෙයි.

ඉන්දියාවේ ආහාර පාන සහ නවාතැන් පහසුකම් අඩපණ වීම නිසා, දකුණු ආසියාවට පැමිණෙන ජාත්‍යන්තර සංචාරකයින් ලංකාව වෙත වැඩි වශයෙන් ආකර්ෂණය වීමේ හැකියාවක් පවතී.

වර්තමානයේ ලංකාව තුළ ගෑස් සහ ඉන්ධන සැපයුම ස්ථාවර මට්ටමක පැවතීම, විදේශීය ආයෝජකයින්ට සහ සංචාරකයින්ට සුබදායී පණිවිඩයක් වනු ඇත.

ඉන්දීය රජය මේ වන විට අත්‍යවශ්‍ය භාණ්ඩ පනත යටතේ ගෑස් නිෂ්පාදනය ඉහළ නැංවීමට පියවර ගෙන ඇති අතර, එරට අගමැති නරේන්ද්‍ර මෝදි මහතා ද මේ පිළිබඳව හදිසි සාකච්ඡා පවත්වා තිබේ.