ලෙඩේට බෙහෙත් ගන්න ඇවිත් රෝහල් ඇඳේදීම විලංගු වැටුණු අපූරු රෝගියෙකු පිළිබඳ පුවතක් කළුතර නාගොඩ රෝහලෙන් වාර්තා වනවා.
මතුගම පිඹුර රෝහලේ ප්රතිකාර ලබමින් සිටි පුද්ගලයෙකු වැඩිදුර ප්රතිකාර සඳහා කළුතර නාගොඩ රෝහලට මාරු කර එවා තිබෙනවා.
එහිදී රෝගියා පරීක්ෂා කිරීමට පැමිණි වෛද්යවරිය ඔහුගේ රුධිර පීඩනය (Pressure) පරීක්ෂා කිරීමට උත්සාහ කර ඇති අතර එම අවස්ථාවේදී මෙම රෝගියා වෛද්යවරියගේ පපු ප්රදේශය ස්පර්ශ කරමින් ලිංගික අතවරයක් සිදු කර ඇති බවයි වාර්තා වන්නේ.
එයින් කෝපයට පත් වෛද්යවරිය “මේ ගැන පොලිසියට පැමිණිලි කරනවා” යැයි ඔහුට අනතුරු අඟවා තිබෙනවා.
නමුත් පුදුමයට කරුණ නම්, එම අනතුරු ඇඟවීමෙන් පසුවත්, නැවත පරීක්ෂා කිරීමකට ගිය අවස්ථාවේදීත් මොහු දෙවැනි වරටත් එම වෛද්යවරියටම අතවර කිරීමට උත්සාහ කිරීමයි.
වෛද්යවරිය කළ පැමිණිල්ලකට අනුව වහාම ක්රියාත්මක වූ කළුතර දකුණ පොලිසිය, රෝහල් ඇඳේ සිටි සැකකරු අත්අඩංගුවට ගෙන ඇති අතර දැන් ඔහුට ප්රතිකාර ලබන්නට සිදුව ඇත්තේ පොලිස් ආරක්ෂාව මධ්යයේයි.
මහගම, සමගිපුර ප්රදේශයේ පදිංචිකරුවෙකු වන මෙම සැකකරු අද (15) කළුතර මහේස්ත්රාත් අධිකරණයට ඉදිරිපත් කිරීමට නියමිතයි.
