ට්‍රම්ප්ගේ ප්‍රකාශය ලෝක වෙළෙඳපොළ කළඹයි – රන් මිල බසියි – තෙල් මිල ඉහළට

ට්‍රම්ප්ගේ ප්‍රකාශයෙන් ලෝක වෙළෙඳපොළ කැළඹෙයි – රන් මිල පහතට – තෙල් මිල ඉහළට

ඉරානය සමඟ පවතින යුදමය වාතාවරණය අවසන් කිරීම සම්බන්ධයෙන් අමෙරිකානු ජනාධිපති ඩොනල්ඩ් ට්‍රම්ප් මෙතෙක් පැහැදිලි ප්‍රකාශයක් සිදු නොකිරීම හේතුවෙන් ලෝක වෙළෙඳපොළේ රන් මිලෙහි විශාල පහත වැටීමක් අද (02) වාර්තා විය.

දින හතරක් පුරා අඛණ්ඩව ඉහළ යමින් පැවති රන් මිල මෙලෙස 1% කට වඩා වැඩි අගයකින් පහත වැටී ඇත්තේ ආයෝජකයින් තුළ ඇති වූ අවිශ්වාසය හේතුවෙනි.

ලෝක වෙළෙඳපොළේ රන් මිල 1.3% කින් පහත වැටී ඇති අතර, එහිදී රන් අවුන්සයක මිල අමෙරිකානු ඩොලර් 4,694.48 ක් ලෙස සටහන් විය.

මීට සමගාමීව අමෙරිකානු රන් මිල ද 1.9% කින් පහත වැටී ඩොලර් 4,723.70 ක් දක්වා අඩු වී තිබේ.

යුද්ධය අවසන් වනු ඇතැයි පැවති බලාපොරොත්තු බිඳ වැටීම මෙම මිල පහත වැටීමට ප්‍රධානතම හේතුව වී ඇත.

විශේෂයෙන්ම ඉදිරි සති කිහිපය තුළ ඉරානයට “ඉතා දැඩි ලෙස” පහර දෙන බවටත්, ඔවුන්ව “ශිලා යුගයට” ඇද දමන බවටත් ජනාධිපති ට්‍රම්ප් කළ දැඩි ප්‍රකාශය ආයෝජකයින්ගේ දැඩි අවධානයට ලක්ව තිබේ.

රන් මිල පහත වැටීමට සාපේක්ෂව ලෝක වෙළෙඳපොළේ බොරතෙල් මිල 4% කින් ඉහළ ගොස් ඇත.

යුදමය තත්ත්වය නිසා සැපයුම් ජාලයන්ට බාධා පැමිණිය හැකි බවට ඇති වූ බිය මීට හේතුවයි.

මේ අතර රන් මිල අඩුවීමත් සමඟ අමෙරිකානු ඩොලරයේ අගය ද සැලකිය යුතු ලෙස ශක්තිමත් වී ඇති බව වාර්තා වේ.